Einar Orri Einarsson, leikmaður Keflavíkur í Pepsi-deild karla í fótbolta, verður í banni þegar liðið mætir Stjörnunni á Samsung-vellinum á laugardaginn í 21. umferð deildarinnar.
Einar Orri fékk sitt tíunda gula spjald þegar Keflavík tapaði, 4-0, gegn ÍA í síðustu umferð, en Keflvíkingar eru nú þegar fallnir niður í 1. deild.
Þó tíu gul spjöld sé vissulega mikill fjöldi í 22 leikja móti er þetta ekki persónulegt met hjá þessum mikla nagla sem kallar ekki allt ömmu sína á fótboltavellinum.
Einar Orri fékk nefnilega ellefu gul spjöld á síðustu leiktíð, þar af tvö gul spjöld í sama leiknum tvisvar sinnum sem leiddi til brottvísunar.
Við það bætti hann svo tveimur gulum spjöld í Borgunarbikarnum en í heildina voru þau þrettán á síðasta sumri.
Einar Orri verður ekki með Keflavík sem fyrr segir í næsta leik en getur jafnað eigið met fái hann gult spjald í lokaleiknum gegn Leikni á heimavelli.
Oliver í leikbann
Breiðablik á enn veika von á Íslandsmeistaratitlinum, en til þess að svo verði þarf liðið að vinna næstu tvo leiki sína og treysta á að FH misstígi sig.
Breiðablik mætir ÍBV á laugardaginn, en þar verður liðið án miðjumannsins Olivers Sigurjónssonar sem hefur verið einn af betri leikmönnum Íslandsmótsins. Hann var úrskurðaður í bann fyrir fjögur gul spjöld.
Aðrir sem voru úrskurðaðir í leikbann af aga- og úrskurðarnefnd KSÍ í gær eru: Kristján Flóki Finnbogason, FH, Frans Elvarsson, Keflavík, Vladimir Tufegdzic, Víkingi, Arnþór I. Kristinsson, Víkingi, Stefán Logi Magnússon, KR og Gunnar Már Guðmundsson, Fjölni.
