Getur loksins keypt sér hús

Russell Wilson er búinn að leiða Seattle Seahawks tvisvar í Super Bowl-leikinn en hann var samt á ótrúlega lélegum launum miðað við aðrar stjörnur deildarinnar.

Á síðustu þremur tímabilum hefur hann „aðeins" fengið 296 milljónir króna í laun. Það er skiptimynt við hlið annarra leikmanna í hans gæðaflokki.

Hann er loksins búinn að fá samning sem hann á skilið en þeim samningi var þó ekki landað fyrr en á elleftu stundu. Nýi samningurinn er upp á hátt í 12 milljarða króna. Hann er öruggur með að fá 8 milljarða þó svo hann missi annan fótinn í fyrramálið.

Wilson segir að umboðsmaður hans hafi meinað honum að kaupa sér hús þar til hann fengi almennilegan samning. Hann hefur því verið að leigja.

„Ég held ég geti örugglega keypt mér hús núna," sagði Wilson en virtist samt enn vera að bíða eftir græna ljósinu frá umbanum.