Miðvörður úr gullaldarliði Skagamanna sló fyrsta höggið á Íslandsmótinu í golfi

Íslandsmótið í golfi 2015 á Eimskipsmótaröðinni var sett í morgun á Garðavelli á Akranesi. Þórður Emil Ólafsson formaður Golfklúbbsins Leynis og Eggert Ágúst Sverrisson varaforseti Golfsambands Íslands settu mótið með formlegum hætti í blíðskaparveðri.

Ólafur Adolfsson, formaður bæjarráðs sló fyrsta högg mótsins en hann hafði æft af kappi og undirbúið sig vel fyrir þessa áskorun. Höggið var þráðbeint og hélt Ólafur boltanum vel niðri í hliðarvindinum.

Færri keppendur komust inn í mótið en vildu en 120 karlar eru skráðir til leiks og 30 konur.

Leiknar verða 72 holur á fjórum dögum en fækkað verður í keppendahópnum eftir 36 holur. Þeir sem verða í 72 efstu sætunum í karlaflokki komast áfram og 18 efstu í kvennaflokknum. Úrslitin ráðast síðdegis á sunnudag.

Alls eru sex keppendur í kvennaflokki sem hafa fagnað Íslandsmeistaratitlinum.

Valdís Þóra Jónsdóttir (GL) (2009, 2012), Ólafía Þórunn Kristinsdóttir (GR) (2011, 2014), Sunna Víðisdóttir (GR) (2013), Tinna Jóhannsdóttir (GK) (2010), Ragnhildur Sigurðardóttir (GR) (1985, 1998, 2003, 2005), Þórdís Geirsdóttir (GK) (1987).

Alls eru 30 keppendur í kvennaflokki á Garðavelli á Akranesi en 33 keppendur voru á Leirdalsvelli í fyrra hjá GKG. Frá árinu 2001 hefur meðalkeppendafjöldi í kvennaflokknum verið 22.

Árið 2004 voru 17 konur sem tóku þátt þegar Íslandsmótið fór fram árið 2004 á Garðavelli.

Árið 2004 þegar Íslandsmótið fór í fyrsta sinn fram á Garðavelli sigraði Ólöf María Jónsdóttir úr GK eftir spennandi keppni gegn Tinnu Jóhannsdóttur.

Aðeins voru leiknar þrjár umferðir en önnur umferð mótsins var felld niður vegna gríðarlegrar úrkomu fyrri part dags. Úrkoman hafði ekki áhrif á keppnishaldið í karlaflokknum.

Alls eru átta kylfingar á meðal keppenda sem hafa sigrað á Íslandsmótinu í golfi í karlaflokki.

Björgvin Þorsteinsson GA og Úlfar Jónsson GKG eru með sex titla hvor. Birgir Leifur Hafþórsson GKG er ekki á meðal keppenda en hann er við keppni á sterku atvinnumóti í Evrópu á Áskorendamótaröðinni.

Kristján Þór Einarsson (GM) 2008, Ólafur Björn Loftsson GKG (2009), Axel Bóasson (GK)(2011), Haraldur Franklín Magnús (GR)(2012), Heiðar Davíð Bragason (GHD) (2005), Úlfar Jónsson GKG (1986, 1987, 1989, 1990, 1991, 1992), Björgvin Þorsteinsson (GA) (1971, 1973, 1974, 1975, 1976, 1977), Þórður Emil Ólafsson (GL) (1997).

Frétt af Golf.is.