Skeljagrandabróðir á þungan fangelsisdóm yfir höfði sér fyrir „gróf og hrottafengin“ brot

Dómur verður kveðinn upp í málum ákæruvaldsins gegn Kristjáni Markúsi Sívarssyni, Ríkharði Ríkharðssyni, Marteini Jóhannssyni og tveimur 19 ára piltum í Héraðsdómi Reykjaness á mánudaginn. 

Um nokkur mál er að ræða og er Kristján Markús sakborningur í öllum þeirra. Er hann meðal annars ákærður fyrir fimm ofbeldisbrot, þar af tvær frelsissviptingar, nokkra þjófnaði og umferðarlagabrot. Saksóknari fer fram á fimm ára dóm yfir Kristjáni en verjandi hans, Stefán Karl Kristjánsson, telur hæfilega refsingu þrjú til þrjú og hálft ár í fangelsi.

Sleginn með leikjatölvu og stunginn með skærum

Kristján Markús, Ríkharð og Marteinn eru ákærðir fyrir frelsissviptingu í Kópavogi í febrúar í fyrra. Þremenningarnir komu þá inn á heimili manns og réðust þar í sameiningu á hann, meðal annars með höggum og spörkum.

Maðurinn lýsti því fyrir dómi að Kristján Markús hefði slegið hann í andlitið með Play Station-leikjatölvu. Þá sagði hann að Kristján hefði stungið hann með skærum í öxlina og lamið hann með spýtu.

„Ég var allur í blóði og íbúðin var bara eins og eftir stríðsástand. [...] Ég hafði mestar áhyggjur af því að þeir myndu stinga mig í andlitið. Svo er ég líka með innvortis stóma og ég hafði áhyggjur af því að fá högg þar,“ sagði maðurinn fyrir dómi.

Kristján Markús hefur játað að hafa kýlt manninn tvisvar eða þrisvar og potað í hann með skærum en sagði að þau hefðu ekki rist djúpt.

Þá játaði Ríkharð fyrir dómi að hafa hugsanlega hrint manninum en neitaði því að hafa tekið hann kverkataki. Marteinn hefur aðeins viðurkennt að hafa verið á staðnum en neitar að hafa tekið þátt í árásinni. Saksóknari fer engu að síður fram á fangelsisdóma yfir þeim báðum; hann vill Ríkharð í 12-18 mánaða fangelsi og Martein í ársfangelsi.

„Svo láta þeir mig sleikja hundapiss á gólfinu, hrækja á gólfið og láta mig sleikja það“

Hin frelsissviptingin sem Kristján Markús er ákærður fyrir, ásamt 19 ára piltunum tveimur, var gegn 18 ára dreng og átti sér stað í ágúst í fyrra á heimili Sívars Bragasonar, föður Kristjáns, í Vogum á Vatnsleysuströnd. 

Pilturinn sem ráðist var á gaf skýrslu fyrir dómi og voru lýsingar hans heldur ófagrar:

„Ég get ekki sagt nákvæmlega í hvaða röð þetta gerðist en ég get sagt hvað gerðist. Hinir strákarnir voru með rafbyssuna en Diddi [Kristján Markús] var mest að kýla mig. Svo lætur Diddi mig sleikja frunsu sem er framan í honum. Þeir láta rafbyssu á kynfæri mín þannig að ég pissa á mig. Svo láta þeir mig sleikja hundapiss á gólfinu, hrækja á gólfið og láta mig sleikja það,” sagði pilturinn.

Sjá einnig: Hótað lífláti ef hann segði frá

Þá sagði hann ákærðu einnig hafa tekið sprautunál og sprautað í lærið á honum. Þeir hafi einnig tekið eldhúshníf og skorið í bakið á honum.

„Þeir létu mig drekka átta flöskur af smjörsýru. [...] Svo eru þeir að kýla mig á fullu og láta mig syngja fyrir sig á meðan ég var grátandi.”

Sagði framburð drengsins ýktan og óstöðugan

Fyrir dómi kvaðst Kristján Markús hafa skammað drenginn fyrir að nota nafn hans í hótunum við annan mann. Þá hefur hann játað að hafa kýlt fórnarlambið tvisvar í andlitið með krepptum hnefa en neitaði öðru sem honum er gefið að sök.

Annar piltanna sem ákærður er ásamt Kristjáni viðurkenndi fyrir dómi að hafa gefið fórnarlambinu tvö rafstuð með rafbyssu og hugsanlega slegið hann utan undir eða ýtt við honum. Hinn pilturinn hefur alfarið neitað sök, bæði hjá lögreglu og fyrir dómi. Fer ákæruvaldið fram á 12-18 mánaða fangelsi yfir báðum 19 ára piltunum þrátt fyrir það enda séu brot þeirra „gróf og hrottafengin“ að mati saksóknara. 

Sjá einnig: Lykilvitni segist ekki óttast Didda

Verjandi piltsins sem alfarið hefur neitað sök í málinu, Ólafur Örn Svansson, sagði í málflutningsræðu sinni að framburður drengsins sem ráðist var á væri óstöðugur og ótrúverðugur. Drengurinn hafi til að mynda verið í verulegri neyslu á þeim tíma sem árásin á að hafa átt sér stað og var hann óviss um hversu mikil áhrif sú neysla hafði á hann. 

Framburður piltsins væri verulega ýktur auk þess sem hann sagði framburð hans fyrir dómi allt annan en hjá lögreglu. Sagði verjandinn að hjá lögreglu hefði drengurinn gert skýran greinarmun á því sem aðilar áttu að hafa gert.

Eins og áður segir verður dómur kveðinn upp á mánudaginn.