Tuttugu virkjunarkostir til skoðunar hjá Landsvirkjun

Landsvirkjun segir þá tuttugu virkjunarkosti sem fyrirtækið hefur til skoðunar vera á mismunandi stigum. Eftir eigi að koma betur í ljós hvort magri þeirra sem skemmra eru komnir reynist hagkvæmir og hvort þeir hafi veruleg umhverfisáhrif. Þá er óljóst hvort leyfi fáist fyrir þeim og hvort hægt yrði að tengja þá við flutningskerfið.

Þetta kemur fram í svari fyrirtækisins við fyrirspurn fréttastofu varðandi virkjunarkosti sem fyrirtækið hefur til skoðunar. Fulltrúi fyrirtækisins vildi ekki veita fréttastofu viðtal vegna málsins en svaraði skriflegri fyrirspurn.

Þar kemur fram að erfitt sé að segja með nákvæmni hve mikla orku hægt væri að fá úr mörgum þessara kosta, til að mynda jarðvarma- og vindorkukostum, vegna óvissu um mat á auðlind, aðgengi að landi og fleiri þætta.

Rætt hefur verið síðustu daga og vikur að orku vanti til nýrra verkefna. Til að mynda er ekki búið að finna orku fyrir álver í Skagabyggð en viljayfirlýsing um fjármögnun verkefnisins var undirrituð nýlega.

Landsvirkjun segist ekki getað gefið upp upplýsingar um hvaða virkjunarkosti það telji raunhæft að verði ráðist í á næstunni en bendir á að áætlanir geri ráð fyrir að 45 megawatta vinnsla geti hafist haustið 2017 í Þeistareykjavirkjunar, sem nú er í byggingu.