Íslendingar í þremur efstu sætunum í golfkeppninni

Íslenska karlalandsliðið í golfi er í góðri stöðu eftir annan hring á Smáþjóðaleikunum sem fara fram hér á landi þessa dagana. Golfkeppnin fer fram á Korpúlfsstaðavelli.

Íslensku keppendurnir raða sér í þrjú efstu sætin í keppninni.

Kristján Þór Einarsson er efstur á samtals fimm höggum undir pari. Næstur kemur Haraldur Franklín Magnús á tveimur undir pari. Andri Þór Björnsson er svo í 3. sæti á pari vallarins.

Daniel Holland frá Möltu er í 4. sæti á pari vallarins og í 5. sæti er Andorra-maðurinn Kevin Esteve Rigaill sem var í 3. sæti fyrir daginn í dag.