Þórður Rafn setti vallarmet á Hlíðavelli

Þórður Rafn Gissurarson atvinnukylfingur úr Golfklúbbi Reykjavíkur setti nýtt vallarmet af hvítum teigum á Hlíðavelli í dag en þar fór fram fyrsta mót íslenska PGA sambandsins af fjórum í sumar.

Hann lék völlinn á 66 höggum eða sex undir pari en hann fékk átta fugla, tvo skolla og tíu pör á hringnum sem spilaðist í mikilli veðurblíðu í Mosfellsbænum.

Davíð Gunnlaugsson, golfkennari í GM, átti gamla vallarmetið sem voru 67 högg en hann var einnig meðal keppenda á mótinu í dag og þurfti því að horfa upp á Þórð hirða metið af sér.

Þórður hefur verið að spila vel að undanförnu en í síðasta mánuði endaði hann í 10. sæti á Opna Madaef atvinnumótinu í Marokkó eftir að hafa leitt eftir fyrsta hring.

Hann mun stoppa stutt á Íslandi þar sem við taka verkefni í Austurríki og Þýskalandi á Pro Golf mótaröðinni en hann mun einnig taka þátt í úrtökumóti fyrir Opna breska meistaramótið í sumar.