Kostnaður vegna verkfalls gæti lent á ferðamönnum

Boðað hefur verið til verkfalls 6. júní, meðal annars í flugafgreiðslu á flugvellinum í Keflavík. Ekki liggur fyrir hvaða áhrif þetta muni hafa á flug frá landinu, en hugsanlegt er að það muni allt falla niður. Upprunalega var einnig boðað til verkfalls 31. maí og 1. júní, en því var frestað.

Komi til þess eiga flugfarþegar þó rétt á að fá fargjöldin endurgreidd né flugmiðanum breytt. Þetta kemur fram á vef Túrista.

Þar segir að staða ferðalanga sem fari út á eigin vegum, sé verri þegar komi að bókunum á gistingu, bílaleigubílum og tengiflugi. Staðgreiðslur á herbergjum fást til dæmis ekki endurgreiddar í ýmsum tilvikum. Þeim sem sjái fram á að breyta ferðaáætlun sinni vegna verkfallanna er bent á að kynna sér skilyrði bókanna sinna.

Á vef Neytendastofu segir að réttur neytenda vegna tafa eða aflýsingar flugs geti verið allt frá hressingum, hótelgistingu, flutningi til og frá flugvelli, endurgreiðslu flugmiða eða skaðabóta. Þá verði fólk að muna að flugrekendum ber að upplýsa farþega um réttindi sín.

„Telji farþegi að flugrekendur brjóti á rétti sínum er hægt að leita til Samgöngustofu og óska eftir ákvörðun stofnunarinnar. Ef flugi er aflýst á farþegi að geta leitað til flugfélagsins sem hann á pantað flug hjá. Ef ferð var keypt af ferðaskrifstofu þá á farþegi að geta leitað til ferðaskrifstofunnar.“

Frekari upplýsingar um réttindi flugfarþega má sjá hér.