Stefnir í 100 þúsund manna verkfall innan fárra vikna

Ríkissáttasemjari segir að grafalvarleg staða sé komin upp í kjaramálum og hann hafi ekki séð kjaraviðræður í öðrum eins hnút frá því hann tók við embætti. Ef samningar náist ekki á næstu vikum stefni í að um eitt hundrað þúsund manns verði í verkfalli undir lok maí.

Klukkan tifar hjá Ríkissáttasemjara. Í morgun var haldinn þar málamyndafundur með fulltrúum Starfsgreinasambandsins og Samtaka atvinnulífsins. Menn voru jákvæðir eftir fundinn en engu að síður er ljóst að langt er í land og deilurnar gætu enn átt eftir að harðna.

Tveimur tímum áður en tólf tíma allsherjarverkfall sextán stéttarfélaga á landsbyggðinni hófst á hádegi kom forystufólk Starfsgreinasambandsins og Samtaka atvinnulífsins í Karphúsið.

„Við höfum ítrekað sagt hér í viðræðum við alla aðila undanfarnar vikur að með þessum hætti séu viðræðurnar einfaldlega í strandi,“ segir Þorsteinn Víglundsson framkvæmdastjóri Samtaka atvinnulífsins. Tónninn var svipaður í Birni Snæbjörnssyni formanni Starfsgreinasambandsins

„Menn ræddu málin. Þetta var aðeins á jákvæðari nótunum heldur en oft áður. En það svo sem gerðist ósköp lítið,“ sagði Björn.

„Við náðum að ræða aðeins frekar þær hugmyndir sem við höfum lagt fram varðandi sérstaka hækkun dagvinnulauna á móti þá lækkun álagsgreiðslna, eins og yfirvinnuprósentu og annað þess háttar,“ segir Þorsteinn.

„Þeir skýrðu sínar hugmyndir. Við eigum eftir að fara með það í okkar bakland og annað. Þeir hafa reyndar rætt þetta áður sem hefur fallið í frekar grýttan jarðveg hjá okkur,“ segir Björn.

Magnús Pétursson ríkissáttasemjari sem tók við embætti árið 2008 og lætur af embætti í lok maí hefur í  nógu snúast síðasta mánuðinn í starfi. Hann segir stöðuna nú þá erfiðustu sem hann hafi séð.

„Já, ég held að það megi segja að þetta sé erfiðasta staðan,“ segir Magnús og bætir við:

„Við sjáum svolítið hvað er fram undan í dag. Starfsgreinasambandið komið í verkföll og búið að leggja niður fyrir sér hvernig það ætlar að halda áfram. Flóabandalagið og verslunarmenn hafa slitið viðræðum hér til að undirbúa aðgerðir og ég held að þetta sé grafalvarleg staða sem upp er kominn,“ segir Magnús.

Þá séu opinberir starfsmenn innan BHM í verkfalli,  samningar BSRB hafi runnið út í dag og deilum fjölgi. Brýnt sé að ná samningum.

„Ég held að það yrðu margir hugsi ef hér yrðu komin yfir hundrað þúsund manns í verkföll í lok maímánaðar. Ég held að það sé afar alvarleg staða ef svo færi. Ef svo illa færi,“ segir Magnús Pétursson ríkissáttasemjari.