Sáttir við undanþágu en vilja lausn kjaradeilu

Bændasamtök Íslands fagna því að Undanþágunefnd Bandalags háskólamanna hefur veitti undanþágur frá verkfalli dýralækna fyrir helgi. Með því getur alifuglaslátrun farið fram.Samtökin líta svo á að með því hafi verið brugðist við alvarlegum dýravelferðarvanda sem kominn var upp í alifuglaræktinni.

Í tilkynningu frá Bændasamtökunum segir að slátrun verði að fara fram jafnt og þétt því annars verði á skömmum tíma of þröngt fyrir fuglana. Með því eykst sjúkdómahætta verulega og almennri velferð dýranna hætta búin.

„Sambærileg staða kemur upp í svínarækt strax í þessari viku, en engar undanþágur hafa verið veittar í þeirri grein. Frá upphafi verkfalls hafa sláturleyfishafar sótt um undanþágur á grundvelli dýravelferðar, eins og skýrt kemur fram i umsóknum sem liggja fyrir hjá Matvælastofnun.“

Þrátt fyrir að undanþága sé veitt er ekki leyfilegt að setja vörurnar heldur eingöngu setja þær í frystingu. Það þýðir að bændur fá ekki greitt fyrir afurðir sínar og Bændasamtökin segja að það muni fljótt leiða til vanda í rekstri búanna.

„Bændasamtökin leggja því þunga áherslu á að deiluaðilar gangi til samninga sem allra fyrst. Vandinn vex með hverjum deginum sem verkfallið stendur og getur valdið óbætanlegu tjóni fyrir íslenskan landbúnað ef það dregst á langinn.“