Kona nálægt því að keppa á HM karla í snóker í fyrsta sinn

Reanne Evans, heimsmeistari kvenna í snóker, mistókst naumlega að verða fyrsta konan sem keppir á HM karla þegar hún tapaði, 10-8, í 128 manna forkeppni heimsmeistaramótsins.

Þessi 29 ára gamla kona frá Dudley sem unnið hefur heimsmeistaramót kvenna undanfarin tíu ár þurfti að lúta í gras fyrir Ken Doherty í spennandi viðureign, 10-8. Doherty varð heimsmeistari árið 1997.

Svo virtist sem Evans væri að fara að brjóta blað í sögunni þegar hún leiddi, 3-1 og 4-3, en Doherty kom sér í 5-4 og hafði tveggja ramma sigur á endanum.

Þar sem Evans komst ekki á karlamótið má hún keppa á HM kvenna sem hefst í Leeds 17. apríl. Það hefur hún, sem fyrr segir, unnið tíu sinnum í röð, en hún vill ólm spreyta sig á móti bestu körlunum.

„Þetta var erfitt en ég hélt bara áfram. Ég er ánægð með að hafa haldið í við spilara sem hefur orðið heimsmeistari og býr yfir allri þessari reynslu. Ég er ekki vön að spila svona langar viðureignir þannig þetta var góð reynsla fyrir mig,“ sagði Evans eftir leikinn.

„Ef ég mætti spila á svona mótum oftar er aldrei að vita hvað gerist. Ef ég hefði náð að jafna í 9-9 held ég að ég hefði unnið. Mér leið vel en ég var svolítið óvön þessu stóru borðum,“ sagði Reanne Evans.