Ingi Þór þjálfar Snæfell áfram

Ingi Þór Steinþórsson, þjálfari karla- og kvennaliðs Snæfells í Dominos-deildunum í körfubolta, verður áfram þjálfari beggja liða.

Þetta kemur fram í fréttatilkynningu frá félaginu í morgun, en Snæfell ákvað að framlengja við Inga Þór sem skilaði Íslandsmeistaratitli í karlaflokki 2010 og kvennaflokki í fyrra.

Ingi Þór á eitt ár eftir af samningnum sem hann skrifaði undir árið 2013, en stjórn Snæfells hafa hann áfram. Ekki kemur þó fram í tilkynningunni hversu langur nýi samningurinn er.

Vinna í leikmannamálum Snæfellsliðanna er á frumstigi og mun fara á fullt á næstu dögum. Einhverjar breytingar verða á leikmannahópi beggja liða.

Karlalið Snæfells komst ekki í úrslitakeppnina í ár en kvennaliðið varð deildarmeistari og er 2-1 yfir gegn Grindavík í undanúrslitarimmu sinni.