Spilaði frábært golf fyrir nýlátna ömmu sína

Bandaríkjamaðurinn Morgan Hoffmann leiðir eftir fyrsta hring á Arnold Palmer Invitational sem fram fer á Bay Hill vellinum í Flórída.

Hoffmann lék á 66 höggum eða sex undir pari sem verður að teljast afar gott, sérstaklega í ljósi þess að hann fékk fréttir af andláti ömmu sinnar rétt áður en hann hóf leik. Hann sagði við fréttamenn að hringurinn í dag hefði verið fyrir hana, enda hefði hún alltaf stutt við bakið á honum á golfvellinum.

Fimm kylfingar deila öðru sætinu á fimm höggum undir pari og fer Ian Poulter þar fremstur í flokki en hann hefur verið að spila mjög vel að undanförnu.

Fleiri stór nöfn koma þar á eftir á fjórum höggum undir pari, meðal annars Adam Scott, Henrik Stenson, Keegan Bradley og Hunter Mahan.

Besti kylfingur heims, Rory McIlroy, byrjaði ágætlega en hann lék á 70 höggum eða tveimur undir pari á fyrsta hring. Það gerði hann þrátt fyrir 34 pútt á hringnum en boltaslátturinn hjá McIlroy var með besta móti í dag þótt að pútterinn hafi verið kaldur.

Annar hringur fer fram á morgun og verður í beinni útsendingu á Golfstöðinni frá klukkan 18:00.