J.B. Holmes með þægilegt forskot fyrir lokahringinn á Cadillac Championship

Það gerist ekki oft á PGA-mótaröðinni að einn kylfingur leiði mót frá fyrsta hring og takist síðan að sigra en fyrir lokahringinn á Cadillac meistaramótinu er það staðan sem Bandaríkjamaðurinn J.B. Holmes er í.

Holmes hefur leikið frábært golf hingað til og er á 11 höggum undir pari eftir þrjá hringi en hann hefur fimm högga forskot á Bubba Watson og Dustin Johnson sem deila öðru sætinu á sex höggum undir pari.

Doral völlurinn hefur reynst bestu kylfingum heims erfiður um helgina en aðeins tólf kylfingar eru undir pari eins og er.

Tilþrif gærdagsins átti forystusauðurinn Holmes en hann fór holu í höggi á fjórðu holu sem er rúmlega 210 metrar að lengd. Það gerði Dustin Johnson einnig en það var hreint út sagt ótrúlegt að sjá tvo kylfinga í toppbaráttunni fara holu í höggi með stuttu millibili.

Fimm högg geta verið fljót að fara í jafn stórum mótum og Cadillac meistaramótinu en lokahringurinn verður í beinni útsendingu á Golfstöðinni frá klukkan 17:00 í dag.