Snæfell náði fjögurra stiga forskoti á toppnum

Snæfell jók forskot sitt á toppi Dominos-deildar kvenna í körfubolta í kvöld því á sama tíma og liðið vann öruggan sigur á Hamar í Hveragerði þá töpuðu Keflavíkurstúlkurnar í Grindavík.

Snæfell hefur nú fjögurra stiga forskot á Keflavíkurliðið sem var án margra sterkra leikmanna í leiknum í Röstinni í kvöld. Liðin berjast um deildarmeistaratitilinn og heimavallarrétt út alla úrslitakeppnina.

Snæfell vann 24 stiga sigur á Hamar, 64-40, en Hamarsliðið skoraði aðeins fimmtán stig í seinni hálfleik. Kristen Denise McCarthy var með 20 stig og 18 fráköst hjá Snæfelli og fyrirliðinn Hildur Sigurðardóttir bætti við 16 stigum, 10 fráköstum og 5 stoðsendingum.

Grindavík vann níu stiga sigur á Keflavík, 67-58, í generalprufunni fyrir bikarúrslitaleikinn en Keflavík lék án þriggja lykilmanna í leiknum, hinnar bandarísku Carmen Tyson-Thomas, leikstjórnandans Ingunnar Emblu Kristínardóttur og fyrirliðans Birnu Valgarðsdóttur.

Pálína Gunnlaugsdóttir skoraði 20 stig fyrir Grindavík og Kristina King var með 12 stig. Sara Rún Hinriksdóttir skoraði 12 stig fyrir Keflavík.