Eins og leikmenn hafi ekki trú á því sem þjálfarinn er að gera

Guðjón Guðmundsson og Kristján Arason krufu leik íslenska liðsins í HM-kvöldi á Stöð 2 Sport.

„Það þarf að skoða aðdraganda mótsins og heildarmyndina. Hvernig liðið undirbjó sig fyrir mótið og síðan leikina í undirbúningnum. Við getum ekki alltaf afsakað okkur og sagt að við höfum farið óvart inn á mótið og þjálfarinn hafði lítinn tíma," sagði Guðjón Guðmundsson í HM-kvöldi á Stöð 2 Sport.

„Það er eins og leikmenn hafi enga trú á því sem þjálfarinn er að gera. Ég get ekki séð betur. Auðvitað er Aron Kristjánsson frábær þjálfari með gott lið í Danmörku. Það er ekki að sjá liðið hafi neina trú á því sem lagt er upp með fyrir leiki. Leikur liðsins hlýtur að endurspegla það sem verið er að gera á æfingum. Ég trúi ekki öðru."

Menn velta nú fyrir sér framtíð Arons sem landsliðsþjálfari.

„Ég vil meina að undirbúningurinn hafi verið skammur og Aron hafði ekki leiki í haust til þess að prófa eitthvað nýtt. Hann reyndi 5/1 vörn rétt fyrir mót og Aroni er vorkunn," sagði Kristján Arason.

„Það sem kom mér á óvart með leikmennina er hvað þeir virkuðu þungir. Var spilað of þétt fyrir mót? Hvað var svona mikið að? Við spiluðum ágætlega gegn Frökkum og Egyptum en síðan virkaði liðið mjög þungt. Við þurfum svör frá strákunum af hverju þeir virkuðu svona þungir."

Ekki missa af neinu sem gerist á HM. Fylgdu Vísi á Twitter, Facebook og Snapchat (notendanafn: sport365).