Nú fá "óhreinir“ íþróttamenn fjögurra ára bann

Íþróttamenn sem falla á lyfjaprófi eiga nú von á tvöfalt lengra banni en áður eftir að nýjar og harðari reglur tóku gildi hjá WADA í dag, 1. janúar 2015.

Minnsta refsing var áður tveggja ára bann frá æfingum og keppni en nú missa óhreinir íþróttamenn alltaf úr fjögur ár eða meira verði þeir uppvísir af lyfjasvindli.

Þetta er ekki eina breytingin sem var gerð á lagabálki Alþjóðalyfjaeftirlitsins því hér eftir verður minni linkind gagnvart þeim sem missa af prófum en jafnframt geta þeir sem hjálpa til við rannsókn mögulega tryggt sér vægari refsingu.

Þeir sem missa af þremur lyfjaprófum á innan við tólf mánuðum fá nú tveggja ára bann í stað 18 mánaða banns áður.

Aðilar sem aðstoða íþróttafólkið við að taka ólögleg lyf eiga líka von á mun harðari refsingu en áður.

Það munu samt ekki allir fá fjögurra ára bann af þeim sem falla á lyfjaprófi. Þeir sem geta sannað það að lyfjainntakan hafi verið þeim óafvitandi fá "bara" tveggja ára bann.

Nýju reglurnar voru samþykktar af Alþjóðalyfjaeftirlitinu í nóvember en áður hafði nefnd á vegum eftirlitsins unnið að breytingunum í átján mánuði.

Íþróttafólk hefur verið að snúa aftur í fremstu röð eftir að hafa fallið á lyfjaprófi. Það verður hinsvegar að teljast ólíklegt að það sé hægt eftir fjögurra ára bann.