„Ég er hinn fullkomni tískubloggari"

Trendsetterinn er 20 og eitthvað ára „fashion og lifestyle“ bloggari á síðunni trendsetterinn.wordpress.com sem sló rækilega í gegn í vikunni. Þar sýnir hún spennandi hluti, nýjar snyrtivörur sem hún fær gefins, fallegan mat í krukkum og fleira.

Fréttablaðið fékk einkaviðtal við Trendsetterinn sem leiddi okkur í allan sannleika um hvernig ná skal langt sem tískubloggari.

Hvernig byrjaði þetta? „Fólk í kringum mig var búið að taka eftir því hversu góð tískuvitund mín væri og bað mig um að blogga. Ég er líka frábær kokkur og get gert kökur með rósakremi. Á líka fullt af iittala-dóti og alls konar fallegu fyrir heimilið sem ég get sýnt öðrum. Ég hef þetta allt. Ég er hinn fullkomni tískubloggari,“ segir Trendsetterinn.

En hvernig hafa viðbrögðin verið við blogginu? „Þau hafa verið betri en ég átti von á og ég er nú þegar komin með stór verkefni, sem ég get því miður ekki talað um eins og er. Ég get samt sagt að mér hefur verið boðið að keppa í Eurovision fyrir Íslands hönd og að skrifa handritið að Áramótaskaupinu. Ég afþakkaði bæði boðin,“ segir hún. 

Innblástur segist hún fá úr sínu eigin höfði, enda sé hún mjög skapandi manneskja með mikið tískuvit. „Mér finnst langskemmtilegast að gera persónuleg blogg og svona „new in“ blogg. Þá get ég sýnt lesendum allt það sem ég hef verið að kaupa mér og það sem er búið að gefa mér frítt.“ 

Að vera bloggari hlýtur að hafa sína kosti, en hún segist því miður ekki vera að raka inn á þessu. „Það er það eina sem ég er ósátt við. Það er ekki verið að senda mér nóg af fríu dóti. Ég hvet fyrirtæki til þess að hafa samband við mig,“ segir hún. Hvert stefnir Trendsetterinn? „Á toppinn! Bloggið er ákveðið start fyrir ferilinn. Mig langar að gera eigin sjónvarpsþátt og bíð bara eftir símtalinu. Ég ætla að halda áfram að lifa og hrærast í þessum heimi þar til ég verð 35 ára, en þá mun ég verða forseti Íslands.“ 

Trendsetterinn leitar eins og er að umboðsmanni og biður áhugasama um að bjóða sig fram. „Ég er búin að tala við Óla Geir [Ólaf Geir Jónsson] en hann var því miður upptekinn við að skipuleggja klámkvölds-aðventutónleika í Hallgrímskirkju.“