Þrotabúi IceCapital dæmdar yfir 500 milljónir

Þrotabú IceCapital, sem áður hét Sund og var í eigu fjölskyldu Óla í Olís, hefur fengið dæmdar um 520 milljónir króna vegna riftunar á ýmsum gerningum sem fram fóru haustið 2008 og í byrjun ársins 2009. Átta dómar vegna riftunarmála voru kveðnir upp í Héraðsdómi Reykjaness á fimmtudag í síðustu viku þessa efnis.

Hæsta einstaka upphæðin er 120 milljónir króna sem þrotabúið fær greiddar vegna riftunar á kaupsamningi um sölu IceCapital til NF Holding á 66% hlut í Norðurflugi þann 12. desember 2008 en hluturinn var siðar seldur eignarhaldsfélaginu Puma. Þrotabúið byggði riftunarkröfu sína aðallega á því að salan á hlutafé stefnanda til stefnda NF Holding ehf. hafi verið gjafagerningur sem væri riftanlegur. Héraðsdómur féllst á þann málatilbúnað.

Einnig var rift kaupsamningi milli þrotabús IceCapital ehf., og Jóns Kristjánssonar, þáverandi stjórnarformanns IceCapital og stjórnarmanns í BYR sparisjóði, sem gerður var 4. nóvember 2008 um kaup IceCapital á stofnfjárbréfum í Byr að verðmæti 90.315.122 krónur, en dómurinn segir að bréfin hafi verið verðlaus þegar viðskiptin voru gerð. Einnig var rift kaupum IceCapital á stofnfjárbréfum í Byr að verðmæti 90.315.122 krónur af Páli Þór Magnússyni, sem var framkvæmdastjóri IceCapital.

Þá var rift er arðgreiðslu til Páls Þórs Magnússonar, að fjárhæð 31.798.642 krónur sem greidd var 9. október 2008. Dómurinn segir ekki fara á milli mála að frá og með 6. október 2008 hafi stefnandi verið orðinn ógjaldfær. Einnig er rift arðgreiðslum til Gunnþórunnar Jónsdóttur, að fjárhæð samtals 38.144.786 krónur og launagreiðslum að fjárhæð 5.632.049 krónur.

Þessar upphæðir eru þó ekki nema brot af því sem IceCapital skuldaði við bankahrun en talið var að skuldirnar við islensku bankana væru 64 milljarðar króna.