Tveir dæmdir úr leik og Arnar Helgi fékk bronsið

Arnar Helgi Lárusson fékk síðbúin bronsverðlaun í 200 metra hjólastólakappakstri í flokki T53 á EM fatlaðra í Swansea í kvöld.

Hann hafnaði í fimmta og síðasta sæti í keppninni í dag, en nú undir kvöldið kom í ljós að tveir keppendur voru dæmdir úr leik.

Frakkinn Nicolas Brignone, sem fékk bronsið, og Ítali sem varð í fjórða sæti styttu sér leið í gegnum beygju, en brautin var blaut og erfið viðureignar.

Íslenski hópurinn var í kvöldmat þegar hann fékk skilaboð frá mótstjórn að Arnar Helgi ætti að mæta í verðlaunaafhendingu, að sögn Jóns Björns Ólafssonar, fararstjóra.

Þetta eru fyrstu verðlaun Arnars Helga á stórmóti, en hann varð einnig í fimmta sæti í 100 metra hjólastólakappakstrinum.