Sinfóníuhljómsveit Íslands fær fjórar stjörnur í The Times

The Times birti í dag dóm eftir tónleika Sinfóníuhljómsveitar Íslands á BBC Proms síðastliðinn föstudag og hlutu þeir fjórar stjörnur af fimm mögulegum hjá gagnrýnanda blaðsins.

Sinfóníuhljómsveit Íslands lék á einni þekktustu og virtustu tónlistarhátíð heims, BBC Proms, í Royal Albert Hall í Lundúnum 22. ágúst síðastliðinn.

Hljómsveitin spilaði fyrir fullu húsi en salurinn tekur yfir 5000 manns. Á efnisskrá tónleikanna voru verk eftir Hauk Tómasson, Jón Leifs, Schumann og Beethoven.

Hljómsveitarstjóri var Ilan Volkov og einleikari var bandaríski píanóleikarinn Jonathan Biss. Hljómsveitin lék tvö aukalög eftir fagnaðarlæti tónleikagesta.

Tónleikunum var útvarpað beint í breska ríkisútvarpinu BBC 3 og á Rás 1.