Formaður Vina Ísraels kennir Hamas um átökin

 „Bæði Arabar eða Palestínumenn, hvernig sem við köllum þetta, kristnir og múslimar, þeir vilja ljúka þessu af. Hvort sem er haldið með einum eða öðrum, það er ekki það sem skiptir máli, bara ljúka þessu af.“

Þetta segir Ólafur Jóhannsson, formaður félagsins Zion Vinir Ísraels og stjórnandi sjónvarpsþáttarins Ísrael í dag á Omega. Ólafur, sem býr í Ísrael sex mánuði ársins og hefur farið með Íslendinga í leiðsöguferðir þangað, var gestur í Bítinu á Bylgjunni í morgun. Hann segist vera í sambandi við palestínska vini sína á svæðinu sem margir hverjir standi með Ísrael  í deilum þeirra við Palestínumenn.

„Það er af því að þeir vilja ljúka þessu af,“ segir Ólafur. „Undanfarin allavega tíu ár er búið að vera stöðugar sprengjuárásir frá Gaza-svæðinu yfir á Ísrael. Í byrjun, eins og við vitum, þá voru skot þeirra eða eldflaugar ekki mjög sterkar. En í dag eru þær mjög sterkar. Þær eru sjötíu til áttatíu kíló og drífa hundrað og fimmtíu kílómetra. Þær ná til Jerúsalem, til Tel Aviv og  til Haifa.“

Ísrael beið of lengi með að svara

Ólafur segir að Íslendingar átti sig jafnframt ekki á stærð og umfangi gangakerfisins sem Ísraelsstjórn vill uppræta.

„Það eru bílar sem aka í gegnum þessi göng. Þegar það er talað um jarðgöng, þá held ég að margir hugsi að þau séu bara eins og rottugöng. En þetta er langt frá því.“

Hann segir að ekki sé hægt að ræða við Hamas-samtökin og segist líta svo á að upphaf átakanna sé þeim að kenna.

„Mér og mörgum öðrum finnst, og það má vera að einhver dæmi mig sem fanatískan út af þessu, mér finnst að ísraelska varnarliðið hafi ekki verið nógu duglegt að svara þessum árásum. Það var beðið í alltof langan tíma. Þangað til sá leiðinlegi atburður skeði að þremur ísraelskum drengjum, sextán til sautján ára, var rænt og þeir fundust myrtir, dánir eða hvernig sem við orðum það. Það gæti hafa verið svona sprengja í þessum málum.“

Hlusta má á viðtalið við Ólaf í heild sinni í spilaranum hér fyrir ofan.