McIlroy með góða forystu þegar að Opna breska er hálfnað

Það var falleg stund þegar að Rory McIlroy gekk inn á 18. flötina á Hoylake um kvöldmatarleitið í kvöld en Norður-Írinn ungi hefur farið á kostum á Opna breska meistaramótinu til þessa og fékk fyrir það frábærar viðtökur frá þakklátum golfáhugamönnum.

Þegar að mótið er hálfnað leiðir McIlroy með fjórum höggum en hann er á 12 höggum undir pari eftir tvo glæsilega hringi upp á 66 högg eða sex undir pari. Næstur á eftir honum, fjórum höggum á eftir er Bandaríkjamaðurinn högglangi Dustin Johnson en hann lék best allra í dag, á 65 höggum eða sjö undir og er samtals á átta höggum undir pari.

Margir magnaðir kylfingar koma jafnir í þriðja sæti á samtals sex höggum undir pari en það eru þeir Francesco Molinari, Jim Furyk, Ryan Moore, Louis Oosthuzen, Sergio Garcia, Charl Schwartzel og Rickie Fowler.

Tiger Woods átti hræðilegan dag en hann fékk einn tvöfaldan og einn þrefaldan skolla á hringnum sem hann lék á 77 höggum eða fimm yfir pari. Hann er samtals á tveimur höggum yfir pari og rétt náði niðurskurðinum með einu höggi eftir að hafa fengið fugl á 18. holu.

Margir þekktir kylfingar náðu ekki niðurskurðinum að þessu sinni en þar ber helst að nefna Masters meistarann Bubba Watson, Miguel Angel Jimenz, Ian Poulter, Lee Westwood og Ernie Els.

Eins og það íslenska er breska sumarið allaf að koma á óvart og eftir tvo fallega og þurra daga gæti rignt mikið á morgun og svörtustu spár spá jafnvel hagléli á tímabili.

Það verður því áhugavert hvernig bestu kylfingar heims takast á við þá áskorun en ljóst er að helgin á eftir að verða mjög spennandi fyrir golfáhugamenn um víða veröld sem fylgjast með þessu sögufræga móti af ástríðu.

Bein útsending frá þriðja hring hefst klukkan 09:00 í fyrramálið á Golfstöðinni.