Slökkviliðsstarf mun standa fram á nótt

Enn logar eldur í húsakynnum Griffils og efnalaugarinnar Fannar í Skeifunni í Reykjavík en allt tiltækt lið slökkviliðsins var ræst út upp úr klukkan átta í kvöld. Kranabíll er nú að rífa húsnæðið þar sem verslun Griffils er til húsa en lítið annað en burðargrind hússins lifir.

Bjarni Kjartansson, sviðsstjóri hjá forvarnarsviði Slökkviliðsins á höfuðborgarsvæðinu segir eld enn vera til staðar í húsinu.

„Við höfum náð stjórn á eldinum en einhver vinna er eftir að slökkva hann. Við munum verða hér langt fram á nótt að slökkva eldinn. Það er ekki hægt að fara inn í bygginguna vegna hættu á að bitar hrynji.“

Bjarni sagði starfsmenn Orkuveitunnar vinna að því að skrúfa fyrir heitt vatn í húsinu til að koma í veg fyrir frekari vatnsskemmdir auk þess að losa niðurföll svo það vatn sem þegar er á svæðinu komist greiðlega á brott.

Björgunarsveitarmenn gæddu sér á sælgæti og gosi úr Víði

Þegar fréttamann bar að garði voru björgunarsveitarmenn að gæða sér á sælgæti og gosi úr hillum verslunar Víðis. Bjarni segir verslunina hafa sloppið ótrúlega vel. „Það er varla reykjarlykt þarna inni.“

Bjarni biðlar til fólks að halda sig utan gulu borðanna öryggi þeirra vegna. „Það er hætta á að húsin hrynji og þá geta bitar úr húsinu skotist í allar áttir.“

Bjarni gerir ráð fyrir því að einhver hluti Skeifunnar verði enn lokaður á morgun.