Oddvitaáskorunin - Menningin blómstrar í Borgarbyggð

Vísir stendur fyrir Oddvitaáskoruninni 2014 þar sem skorað er á oddvita allra flokka í kjördæmum um land allt að taka þátt.

Björn Bjarki Þorsteinsson leiðir lista Sjálfstæðisflokksins í Borgarbyggð í sveitarstjórnarkosningunum í vor.

Björn Bjarki Þorsteinsson heiti ég og skipa 1. sæti á lista Sjálfstæðismanna í Borgarbyggð. Ég er 45 ára gamall, uppalinn í Borgarnesi og á ættir að rekja í heimahéraðið og í Hrútarfjörð.  Kona mín er Guðrún Ólafsdóttir skrifstofumaður og eigum við saman fjóra snillinga, þau Jóhönnu Marín, Ólaf Axel, Andra Stein og Aron Inga.

Ég starfa sem framkvæmdastjóri Brákarhlíðar í Borgarnesi, sem er hjúkrunar- og dvalarheimili aldraðra í héraðinu, þar er ég einn af um 75 frábærum starfsmönnum. Ég er formaður byggðarráðs Borgarbyggðar og hef mikinn áhuga til þess að fá að gegna því verkefni áfram að afloknum kosningum.

Við Sjálfstæðismenn munum leita eða auglýsa eftir sveitarstjóra að afloknum kosningum ef við verðum í stöðu til þess að hafa áhrif á það val. Atvinnumál munu verða í umræðunni í kosningabaráttunni og þar viljum við leggja okkar af mörkum, frambjóðendur Sjálfstæðisflokksins, það eru spennandi hlutir í farvatninu og ef sveitarfélagið getur stutt við þau verkefni þá skal það gerast, sveitarfélagið á ekki að vera beinn þátttakandi í atvinnulífi umfram rekstur sinna stofnana en á að vera stuðningsaðili.

Við viljum standa vörð um háskólana í héraðinu og stuðla að sjálfstæði þeirra áfram, það er mikilvægt byggðamál, skólaflóran okkar er gríðarlega dýrmæt héraðinu og Menntaskóli Borgarfjarðar hefur heldur betur eflt samfélagið með sínu góða starfi. Skólamálin eru stór þáttur í rekstri sveitarfélaga, við eigum góða skóla með góðum starfsmönnum, við þurfum að hlúa vel að þeirri starfssemi og endurbæta húsa- og tækjakost.

Við þurfum að hlúa að málefnum fatlaðra og skapa betri grundvöll fyrir iðju þess góða fólks og skapa atvinnumöguleika, m.a. í samvinnu við atvinnulífið í héraðinu. Við höfum staðið að mikilli uppbyggingu í kringum þjónustu við aldraða og munum hlúa að þeim málaflokk áfram. Nýr þjónustusamningur á milli sveitarfélagsins og Ungmennasambandsins hefur fært ákveðin verkefni tengd tómstunda- og íþróttastarfi út í grasrótina, það verður mjög spennandi að fylgjast með þróun þess mikilvæga málaflokks.

Menning blómstrar í Borgarbyggð, með frjálsum félagasamtökum, kröftugu tónlistarlífi og rekstri öflugra safna, af því getum við verið stolt og héraðið stendur svo sannarlega undir nafni hvað einkunnarorð þess varðar en þau er Menntun, Saga, Menning.

YFIRHEYRSLAN

Hver er fallegasti staðurinn á Íslandi?

Paradísarlaut í nágrenni Bifrastar í Norðurárdal er flottasti staðurinn af mörgum flottum í Borgarbyggð.

Hundar eða kettir?

Hundar, ekki spurning, á einn 10 ára gamlan labrador sem er mikill öðlingur.

Hver er stærsta stundin í lífinu?

Hef verið lánsamur í lífinu en stærstu stundirnar hafa verið þegar börnin koma í heimin, á fjóra snillinga með Guðrúnu minni.

Hver er uppáhaldsmaturinn þinn?

Tja, plokkfiskur með nýju rúgbrauði skorar hátt.

Hvernig bíl ekur þú?

Er oftast á Yarisnum en fæ stöku sinni lánaðan Nissanjeppann hjá konunni.

Besta minningin?

Það tengist börnunum en síðan á maður margar góðar minningar úr Böðvarsgötunni í gamla daga með frábærum æskufélögum og eins  „menningarferðum“ með veiðifélaginu Daníel á Hólnum.

Hefur þú verið tekinn af lögreglunni?

Já, það hafa nokkrar hraðasektir dottið í hús við „mismikla“ ánægju „fjármálastjórans“ á heimilinu.

Hverju sérðu mest eftir?

Ætli það sé ekki helst það að hafa ekki drifið sig í meira nám á sínum tíma.

Draumaferðalagið?

Mig langar til að komast til Kúbu sem fyrst áður en allt „spillist“ þar - eins væri nú gaman að vera viðstaddur einhvern tímann þegar Manchester City tekur við Englandsmeistarabikarnum.

Hefur þú migið í saltan sjó?

Já, í fjörunni fyrir neðan Böðvarsgötuna í Borgarnesi í gamla daga þegar gert var hlé á Marglyttuveiðu.

Hvað er það skrýtnasta sem þú hefur gert?

Að verða hluthafi í hesthúsi, var ekki á „to do“ listanum en er samt mjög dýrmætt, drengirnir mínir eru upprennandi hestamenn.

Hefur þú viðurkennt mistök?

Það hefur nú komið fyrir já :)

Hverju ertu stoltastur af?

Fjölskyldunni minni og síðan því að hafa átt þátt í því núna undanfarin ár að hafa komið húsakosti Brákarhlíðar, hjúkrunar- og dvalarheimilis í Borgarnesi í það horf sem nú er með mínu frábæra samstarfsfólki sem starfar með mér.