Píratakafteinn býður Guðrúnu Bryndísi um borð

Halldór Auðar Svansson, kafteinn Pírata í Reykjavík, sendi frá sér yfirlýsingu í gærkvöldi þar sem hann lýsir yfir eftirsjá af góðum frambjóðanda í sveitarstjórnarkosningunum, og á þar við Guðrúnu Bryndísi Karlsdóttur.

Hún taldi sig vera komna í fyrsta sæti Framsóknarflokksins í Reykjavík eftir að Óskar Bergsson vék úr því sæti vegna lélegs gengis flokksins í skoðanakönnunum. Halldór Auðar býður Guðrúnu Bryndísi jafnframt laust sæti á lista Pírata í borginni, en sem kunnugt er sagði hún sig úr Framsóknarflokknum nýverið.

Guðrún Bryndís sagði farir sínar ekki sléttar eftir veru sína í framsóknarflokknum undanfarna mánuði í pistli sem hún birti í gær. Kom meðal annars fram að menn á bak við tjöldin virtust öllu stjórna, hún hefði fengið „vegginn“ hjá flokksfólki og endurtekið óskað eftir því að hún færi af lista flokksins.