Button: Hraði McLaren er ekki nógu mikill

McLaren þarf að grípa til aðgerða strax og koma með talsverðar uppfærslur til Spánar ef liðið vill halda áfram að berjast um verðlaunasæti í formúlu eitt. Þetta er haft eftir Jenson Button sem er annar af ökumönnum  McLaren-liðsins.

Button viðurkennir að hann skilji ekki hvers vegna liðið hefur misst af lestinni. Í ástralska kappakstrinum náði Magnussen öðru sæti og Button þriðja sæti.

Í Kína endaði Button í ellefta sæti og liðsfélagi hans Kevin Magnussen endaði þrettándi.

„Kína olli öllu liðinu vonbrigðum, þegar allir vinna af krafti og niðurstaðan er svona léleg er það vont, sérstaklega fyrir þá sem eru í verksmiðjunni. Vonandi geta þeir haldið áfram að vera jákvæðir og haldið áfram að uppfæra bílinn því í augnablikinu er hann ekki nógu góður,“ sagði Button.

„Við erum bara ekki með hraða, ég held að önnur lið hafi ekki bætt sína bíla svo mikið svo ég veit ekki alveg hvað við erum að gera,“ sagði Button.

McLaren liðið virðist vera að missa af keppinautunum.

Erfiðlega gengur að fá framdekkin til að virka, þau eyðast bara án þess að skila miklu gripi fyrst. Enginn veit hvað veldur því.