Sjálfstæðismenn með spjótin á lofti á borgarstjórnarfundi í dag

Ársreikningar Reykjavíkurborgar fyrir síðasta ár verða kynntir á fundi borgarstjórnar klukkan tvö í dag. Vísir mun sýna beint frá fundinum.

Sjálfstæðismenn hafa nú birt tölur yfir rekstur borgarinnar undanfarin tólf ár og segir Halldór Halldórsson, oddviti þeirra, á facebook síðu sinni: „Þetta er svona einfalt, undir stjórn Sjálfstæðisflokksins er rekstur borgarsjóðs í plús og niðurgreiðsla skulda borgarinnar. Undir stjórn vinstri aflanna er taprekstur og skuldasöfnun.“

Í samtali við Vísi segir Halldór að Sjálfstæðismenn verði með spjótin á lofti á fundinum í dag. „Við byrjuðum að munda þau í gær. Við munum fylgja þessari umræðu eftir á næstu dögum.“

S. Björn Blöndal, leiðtogi Bjartrar Framtíðar og aðstoðarmaður Jóns Gnarr borgarstjóra, segir að meirihlutinn verði ekki í vörn á fundinum. „Við erum satt að segja afskaplega stolt af því sem við höfum gert. Við höfum komist nokkuð vel í gegnum erfiða tíma og erum ekki í neinni varnarstöðu.“

Fundur borgarstjórnar verður í beinni útsendingu á Vísi og hefst klukkan tvö.