Helga María með mikla bætingu

Helga María Vilhjálmsdóttir stórbætti sinn besta árangur þegar hún varð í fjórða sæti í bruni á norska meistaramótinu í alpagreinum.

Mótið fer fram í Hemsedal og hófst í dag. Helga María fékk 60,61 FIS-stig en fyrir var hún með 81,60 stig á heimslista.

Þetta er reyndar annar dagurinn í röð þar sem hún bætir sinn besta árangur þar sem hún fékk 75,71 stig fyrir að hafna í áttunda sæti á FIS-móti sem fór fram í Hemsedal í gær.

Keppni heldur áfram á föstudag en alls eru átta Íslendingar skráðir til leiks á mótinu.