Þorleifur: Vinnum ef við spilum okkar leik

Þorleifur Ólafsson, fyrirliði Grindavíkur, þekkir það vel að spila til úrslita um bikarmeistaratitil karla.

Hann hefur fimm sinnum farið í úrslit en aðeins unnið einu sinni. Það var árið 2006 en Grindavík mætir ÍR í úrslitaleiknum í Laugardalshöllinni klukkan 16.00 á morgun.

„Svona er þetta, það verður einhver að tapa,“ sagði Þorleifur. „Það er svo að sjálfsögðu ekki planið að tapa þessum leik.“

Hann á von á erfiðum leik gegn ÍR. „Þeir hafa verið að spila virkilega vel og eru verðskuldað komnir svona langt.“

„Ég tel þó að við séum með betra lið - bæði breiðari hóp og betri mannskap. Ef við bara spilum okkar leik ættum við að vera öruggir með sigur.“

„Við gerum okkur fyllilega grein fyrir því að við þurfum að spila hörkuvel til að vinna ÍR-ingana. Þeir eru með mjög gott lið.“