Æsilegar lokasekúndur í DHL-höllinni | Myndband

KR vann eins stigs sigur á Keflavík í uppgjöri toppliðanna í Domino's-deild karla í gærkvöldi eftir ótrúlegar lokasekúndur.

KR hélt í sókn þegar rúmar 20 sekúndur voru eftir þegar staðan var 89-87, Keflvíkingum í vil. Brynjar Þór Björnsson reyndi að setja niður þriggja stiga körfu en skot hans geigaði.

Pavel Ermolinskíj náði þá dýrmætu sóknarfrákasti og var boltanum aftur komið á Brynjar Þór sem reyndi aftur við þrist. Í þetta sinn heppnaðist skotið.

Sjö sekúndur voru þá eftir og náðu Keflvíkingar tveimur skotum að körfu KR-inga. Bæði geiguðu og því fögnuðu KR-ingar sætum sigri, 90-89, eins og sjá má í meðfylgjandi myndbandi.