Hernandez lamdi mann í fangelsinu

Fyrrum NFL-stjarnan, Aaron Hernandez, er ekki hættur að komast í fjölmiðla þó svo hann sitji á bak við lás og slá grunaður um morð.

Hernandez gerði sér lítið fyrir og lamdi annan mann í fangelsinu í vikunni. Sá er hann lamdi var þess utan í handjárnum er Hernandez réðst á hann.

Þeir höfðu verið að rífast síðustu daga og það endaði með því að Hernandez missti þolinmæðina og gekk í skrokk á honum.

Hann þarf að blæða fyrir það enda kominn í einagrun. Þar mun hann dúsa næsta mánuðinn. Hann verður í klefa sínum í 23 tíma á sólarhring. Hann fær ekki einu sinni að borða utan klefans.

Þann klukkutíma sem hann fær utan klefans verður hann að vera í járnum á höndum og fótum.

Hernandez var stórstjarna hjá liði New England Patriots. Enn er verið að rétta yfir honum vegna morðmálsins og hann er einnig grunaður um aðild að fleiri morðum.