,,Ég hefði getað gert betur hefði ég ekki verið svona stressuð“
Ellý Ármanns skrifar
Hér að ofan má sjá þegar sautján ára æskuvinkonurnar Yrsu ír Scheving og Birtu Karlsdóttur frá Höfn í Hornafirði koma fram í sjónvarpsþættinum Ísland Got Talent á Stöð 2 síðasta sunnudag. Þær ætla að halda áfram í tónlistinni þrátt fyrir að hafa fengið brottfaraspjaldið í þetta skiptið.
Æskuvinkonurnar Yrsa Ír og Birta á góðri stundu.„Við höfum þekkst frá því við vorum litlar. Við búum á móti hvor annarri. Við höfum verið bestu vinkonur núna í nokkuð mörg ár,“ segir Yrsa.
Voruð þið stressaðar? „Já þetta var mjög stressandi fyrir okkur eins og kannski sást en okkur fannst þetta bara mjög gaman og ég hefði getað gert betur hefði ég ekki verið svona stressuð en þetta er ekki eitthvað það sem ég mun sjá eftir. Ég læri frekar bara af þessu og geri betur næst,“ segir Yrsa.
„Auðvitað höldum við áfram. Þetta er eitthvað það sem við viljum gera í framtíðinni þar sem við höfum báðar mikinn áhuga á tónlist. Við stefnum á að syngja og spila saman og vonum að við fáum góðar viðtökur við það og fáum kannski einhverntíman plötusamning í framtíðinni.“
Fannst ykkur dómararnir vera ósanngjarnir? „Nei, þeir voru alls ekki of harðir. Við fengum mjög góða dóma en það var mjög mikið klippt úr þessu. Það var miklu meira sem dómararnir sögðu við okkur og þótt að þeir hafi sagt „nei“ við okkur þá ætlum við ekki að hætta spila,“ segir Yrsa bjartsýn á framhaldið enda hæfileikaríkar vinkonur hér á ferð.
