Af öllum spurningum þurfti að spyrja þessarar

Hin nítján ára gamla Eugenie Bouchard tryggði sér í vikunni sæti í undanúrslitum Opna ástralska meistaramótsins í tennis eftir sigur á Önu Ivanovic.

Í viðtali eftir leikinn var Bouchard tekinn í viðtal niðri á velli eins og hefð er fyrir. Þá svarar sigurvegarinn spurningum frammi fyrir áhorfendum á vellinum og heima í stofu.

Auk þess að vera afar efnileg í tennis þykir Bouchard sérstaklega myndarleg stúlka. Það virðist hafa verið uppsprettan að stórskrýtinni spurningu sem Bouchard var spurð að í lok viðtalsins.

Hún hafði svarað spurningum um frábært gengi sitt og góða stuðningsmenn en svo kom að spurningunni sem fjölmargir karlmenn á svæðinu vildu fá svar við að sögn spyrilsins.

„Þeir vilja vita með hverjum úr skemmtanaiðnaðinum þú vildir helst af öllu fara á stefnumót með,“ sagði spyrillinn og afsakaði sig með því að hún væri undir pressu frá karlpeningnum að láta vaða.

Bouchard roðnaði, hugsaði sig um og svaraði svo „Justin Bieber“ og uppskar mikið baul fyrir eins og sjá má í myndbandinu hér að neðan.

Bouchard beið svo lægri hlut í undanúrslitaleiknum gegn Li Na frá Kína.