Snorri: Við erum með betra lið en Norðmenn

Snorri Steinn Guðjónsson var brosmildur er hann hitti blaðamenn eftir leikinn gegn Noregi. Skal engan undra enda frábær sigur hjá íslenska liðinu.

"Það er alltaf gríðarlega mikilvægt að byrja stórmót vel. Við þekkjum báðar hliðarnar á þeim peningi. Þessum leik var stillt upp sem ákveðnum úrslitaleik en auðvitað stendur mótið ekki og fellur með þessum eina leik," sagði Snorri Steinn.

"Það gefur okkur mjög mikið að fá tvö stig hérna. Það gefur ákveðna ró, sjálfstraust og meiri trú á verkefnið þó svo það hafi verið fínt fyrir. Þessi sigur sýnir að við nýttum tímann fyrir mótið gríðarlega vel.

"Við getum verið ánægðir með þennan leik en nú verðum við að ná okkur niður á jörðina og allt það."

Strákarnir voru gríðarlega vel stemmdir fyrir leikinn og hin umtalaða íslenska geðveiki var svo sannarlega til staðar í upphafi leiks.

"Það er sjaldan sem það vantar upp á hana. Heilt yfir var þetta virkilega góður leikur. Fyrri hálfleikur var frábær og við hefðum átt að leiða með meiri mun eftir hann. Vörn og sókn var frábær.

"Það kom smá hik í byrjun síðari hálfleiks en við héldum þeim alltaf í hæfilegri fjarlægð og þetta var þannig séð aldrei í neinni hættu," segir Snorri en frammistaða liðsins kom honum ekki á óvart.

"Ég bar þessi lið saman á pappírunum fyrir leikinn og ég hefði verið gríðarlega vonsvikinn með að tapa þessum leik. Ég get sagt að við erum með betra lið en Norðmenn og við sýndum það í dag."