Goðsagnir mætast í NFL í kvöld

Það ræðst í kvöld hvaða tvö lið munu leika til úrslita í NFL-deildinni þetta árið en þá fara úrslitaleikir NFC- og AFC-deildanna fram.

Super Bowl fer fram í New York eftir tvær vikur en leikurinn fer fram á Metlife-Stadium, heimavelli New York-liðanna Giants og Jets.

NFL skiptist í tvær deildir, Þjóðardeildina (NFC) og Ameríkudeildina (AFC). 32 lið eru í NFL - sextán í hvorri deild. Tólf komust áfram í úrslitakeppnina sem hófst fyrir tveimur vikum síðan og nú standa fjögur lið eftir.

Það verður því spilað til úrslita í deildunum tveimur í kvöld. Í Ameríkudeildinni eigast við New England Patriots og Denver Broncos (klukkan 20.00 á Stöð 2 Sport) en í Þjóðardeildinni lið Seattle Seahawks og San Francisco 49ers (klukkan 23.30 á Stöð 2 Sport).

Brady gegn Manning

Í fyrri viðureign dagsins eigast við tveir af bestu leikstjórnendunum í sögu NFL-deildarinnar. Það eru þeir Peyton Manning (Denver) og Tom Brady (New England).

Manning, sem er 37 ára gamall, hefur aldrei spilað betur en í vetur en hann hefur slegið flest met sem leikstjórnandi getur sett í NFL - og mörg þeirra voru áður í eigu Brady.

Manning gaf 55 snertimarkssendingar þetta tímabilið, þar af sjö í einum og sama leiknum en aðeins sex aðrir leikmenn hafa afrekað það frá upphafi. Hann gaf boltann alls 5477 jarda í sextán leikjum Broncos í deildakeppninni í vetur en það er einnig met.

Þegar rýnt er í tölfræðina er augljóst að Brady hefur oft spilað betur en á þessu tímabili. Hins vegar eru margir á því máli að tímabilið sé eitt hið besta á ferli Brady þar sem honum hefur tekist að koma vængbrotnu og stórbreyttu sóknarliði Patriots alla þessa leið.

Brady hefur þar að auki unnið Manning í tíu leikjum af þeim fjórtán þar sem þeir hafa mæst, þar af tveimur af þremur leikjum þeirra í úrslitakeppninni. Flestir leikja þeirra voru þegar Manning lék með Indianapolis Colts en hann færði sig yfir til Denver fyrir tveimur árum síðan.

Patriots vann þar að auki viðureign þessara liða fyrr í vetur, 34-31, í framlengdum leik. Broncos virtist hafa klárað leikinn í fyrri hálfleik en staðan var 24-0 þegar leikmenn gengu til búningsklefa. Brady gafst þó ekki upp á sá fyrir ótrúlegri endurkomu Patriots í síðari hálfleiknum.

Þrátt fyrir allt þetta er Denver talið sigurstranglegra í leiknum enda talsvert betur mannað í flestum stöðum á vellinum, sérstaklega í sókninni. Denver náði besta árangri allra liða í Ameríkudeildinni en liðið hefur unnið fjórtán leiki í ár en tapað þremur.

Það verður einnig athyglisvert að fylgjast með Wes Welker, útherja Broncos í leiknum í kvöld. Hann kom til Broncos frá Patriots fyrir þetta tímabil og náði einstaklega vel saman við Brady þegar þeir voru samherjar.

Hvorki Patriots né Broncos eru með bestu varnarliðin í NFL þetta árið og því reikna flestir með flugeldasýningu í kvöld. Leikurinn fer fram í Denver og gæti það reynst afdrifaríkt en heimaliðið hefur ávallt borið sigur úr býtum í þeim þremur viðureignum sem Manning og Brady hafa leikið í úrslitakeppninni.

Sprengjusveitin í Seattle

Ólíkt fyrri viðureign kvöldsins er búist við því að leikur Seattle Seahawks og San Francisco 49ers verði slagur tveggja öflugra varnarliða.

Seahawks náði besta árangri allra liða í Þjóðardeildinni í vetur og fá því að spila á sínum ógnarsterka heimavelli þar sem hinir háværu stuðningsmenn liðsins, betur þekktir sem Tólfti maðurinn, hafa komist í Guiness-heimsmetabókina fyrir lætin sem þeir hafa framkallað á leikjum liðsins.

49ers er þó líklega eitt heitasta lið deildarinnar þessa dagana en eftir misjafna byrjun hefur liðið komist á mikið skrið og unnið síðustu átta leiki sína.

49ers komst í Super Bowl í fyrra en tapaði þá fyrir Baltimore Ravens. Colin Kaepernick, hinn ungi leikstjórnandi liðsins, vill vitaskuld fá annað tækifæri til að vinna titilinn nú.

Hann þarf þó fyrst að komast í gegnum ógnarsterka vörn Seahawks-liðsins. Sérstaklega öflug er aftari varnarlína liðsins - sem sérhæfir sig í því að komast inn í sendingar leikstjórnandans - en hún gengur undir viðurnefninu Sprengjusveitin (e. Legion of Boom).

Bæði lið spila í sama riðli - vesturriðli Þjóðardeildarinnar - og spila því tvívegis hvert tímabil. Síðustu tvö árin hefur heimaliðið ávallt borið sigur úr býtum í leikjum þessara liða en sigrar Seahawks hafa verið sérstaklega sannfærandi síðustu tvö árin - liðið vann leikina samanlagt 71-16. Seahawks hefur þar að auki unnið síðustu sex heimaleiki sína í úrslitakeppninni.

Kaepernick hefur spilað vel í síðustu leikjum en hann er aðeins á sínu öðru tímabili sem aðalleikstjórandi síns liðs. Þrátt fyrir það hefur hann spilað fjóra leiki í úrslitakeppni með 49ers og aðeins tapað einum þeirra - í Super Bowl í fyrra. Hann hefur farið með liðið á tvo sterka útivelli í úrslitakeppninni í ár - gegn Green Bay Packers og Carolina Panthers - og unnið þá báða. Hann er því til alls líklegur í kvöld.

Leikstjórnandi Seahawks er einnig ungur og á framtíðina sannarlega fyrir sér, rétt eins og Kaepernick. Sá heitir Russel Wilson og er talinn útsjónarsamur og klókur leikmaður. Hann hefur þó haft hægt um sig í síðustu leikjum liðsins en hann hefur áður sýnt að hann hafi það sem til þurfi í leikjum sem þessum.

Leikurinn í kvöld mun þó ekki einkennast af baráttu leikstjórnendanna, líkt og í hinni viðureign kvöldsins. Þar er margt annað sem kemur til og ekki síst frammistaða hlauparanna Frank Gore hjá 49ers og Marshawn Lynch hjá Seahawks. Báðir eru í hópi bestu leikmanna deildarinnar í sinni stöðu og mun mæða mikið á þeim í kvöld.