Tebow einu stigi frá réttum úrslitum

Hinn vinsæli bandaríski íþróttamaður sem ekkert lið vill samt nota, Tim Tebow, hefur hafið störf í sjónvarpi og fór afskaplega vel af stað.

Það var engu líkara en að hinn strangtrúaði Tebow hefði fengið skilaboð að ofan er hann var beðinn að spá fyrir um úrslitaleikinn í háskólaboltanum en hann tók þátt í útsendingunni.

Tebow spáði því að Florida State myndi vinna Auburn 35-31. Leikurinn fór 34-31 fyrir Florida State og Tebow því aðeins punkti frá réttum úrslitum.

Tebow þótti annars standa sig vel í útsendingunni en hann þarf að hafa eitthvað að gera á meðan hann bíður eftir nýju tækifæri í NFL-deildinni.