Vinna Haukar sjöunda leikinn í röð?

Kvennalið Hauka getur náð öðru sætinu af Snæfelli þegar Haukastelpurnar mæta í Stykkishólm annað kvöld (klukkan 17.00) í 13. umferð Domino‘s-deildar kvenna í körfubolta.

Haukar hafa unnið sex síðustu leiki sína og eru aðeins tveimur stigum á eftir Snæfelli. Snæfell vann eins stigs sigur í fyrri leiknum á Ásvöllum og því má búast við spennandi leik.

Valskonur geta ennfremur tekið fjórða sætið af Hamri með sigri í Hveragerði í kvöld (klukkan 18.00) en það er fyrsti leikur umferðarinnar. KR tekur á móti toppliði Keflavíkur klukkan 19.15 annað kvöld og á sama tíma mætast Njarðvík og Grindavík í Ljónagryfjunni í Njarðvík en þar mun annaðhvort liðið enda langa taphrinu.

Njarðvík hefur tapað níu leikjum í röð en Grindavíkurliðið er með fimm töp í röð á bakinu.