Meðlimur Pussy Riot sendur á spítala

Maria Alekhina, meðlimur rússnesku pönksveitarinnar Pussy Riot, var send á spítala fyrr í dag. Hún situr í fangelsi og hefur verið í hungurverkfalli í sjö daga. Hún ákvað að fara í hungurverkfall eftir að henni var bannað að vera viðstödd ákvörðun um mögulega reynslulausn hennar á miðvikudag í síðustu viku. Dómarar höfnu beiðni hennar um reynslulausnina.

Alekhina var ásamt tveimur öðrum meðlimum Pussy Riot dæmd í tveggja ára fangelsi síðastliðið haust fyrir þátttöku sína í mótmælum gegn Vladimir Pútín. Í bréfi sem hún skrifaði í gær kemur fram að yfirmenn fangelsisins hafi reynt að snúa öðrum föngum gegn henni. Þetta hafi verið gert með því að herða öryggisreglur og þrengja þannig að föngunum í aðdraganda ákvörðunar um reynslulausn hennar. Hún hefur áður greint frá því að yfirmenn í fangelsinu hafi hvatt hættulega fanga til að ógna henni og hóta.