Murray vann í annarri tilraun

Andy Murray bar sigurorð af Stanislas Wawrinka á Mubadala World tennismótinu í Abu Dhabi í dag.

Murray, sem gekkst undir uppskurð á baki í september, tapaði í gær 7-5 og 6-3 gegn Frakkanum Jo-Wilfried Tsonga. Þrátt fyrir tapið var Murray nokkuð sáttur og það var hann líka í dag.

„Það er gott að fá tvo leiki gegn toppleikmönnum,“ sagði Murray. Byrjunin væri því sem næst fullkomin.

Murray, sem er í fjórða sæti heimslistans, keppir næst á móti í Katar í næstu viku. Hann reynir að koma sér í sem best form fyrir Opna ástralska mótið sem hefst 13. janúar.