Evrópuævintýri Ólafs Inga úti | PSV óvænt úr leik

Zulte Waregem tapaði 2-0 á heimavelli gegn Rubin Kazan í lokaumferð D-riðli Evrópudeildarinnar í knattspyrnu. Tapið þýðir að liðið fellur úr öðru í þriðja sæti riðilsins og er úr leik.

Ólafur Ingi Skúlason spilaði allan leikinn á miðjunni hjá belgíska liðinu sem átti í fullu tré við rússneska liðið. Belgunum hefði dugað jafntefli en tvö mörk Rússanna á síðustu tíu mínútum leiksins gerðu drauminn um sæti í 32-liða úrslitum keppninnar að engu.

Maribor frá Póllandi skaust upp fyrir Zulte í annað sætið með 2-1 sigri á Wigan á heimavelli. Maribor og Zulte hafa bæði 7 stig en Maribor stendur betur að vígi í innbyrðisviðureignum.

Afar óvænt úrslit litu dagsins ljós í Hollandi þar sem PSV Eindhoven tapaði 0-1 gegn Chornomorets Odesa frá Úkraínu. Með sigrinum nældu þeir úkraínsku í annað sæti riðilsins á kostnað PSV sem er úr leik.

Swansea tapaði 1-0 úti gegn St. Gallen en nær engu að síður öðru sætinu í A-riðli þar sem Kuban náði ekki að leggja Valencia að velli á Spáni.

Maccabi Tel-Aviv tryggði sér annað sætið í F-riðli með sigri á Bordeaux. Apoel tapaði úti gegn Eintracht Frankfurt sem hafði þegar tryggt sér toppsæti riðilsins.

Liðin tólf sem komin eru áfram úr riðlum A-F eru:

Valencia

Swansea

Ludogorets Razgrad

Chornomorets Odesa

Salzburg

Esbjerg

Rubin Kazan

Maribor

Fiorentina

Dnipro Dinpropetrovsk

Frankfurt

Maccabi Tel-Aviv

Lokastöðuna í öllum riðlunum má sjá hér.