55 metra vallarmark sekúndum fyrir leikslok tryggði sigurinn

Baltimore Ravens unnu dramatískan sigur á Detroit Lions í mánudagsleiknum í NFL-deildinni í gærkvöldi.

Bæði lið eru í kapphlaupi um sæti í úrslitakeppninni sem framundan er. Baltimore hafði verið á mikilli siglingu en farið að fjara undan ljónunum frá Michigan.

Baltimore hafði 18-16 sigur en hetja kvöldsins var sparkarinn Justin Tucker. Þegar 43 sekúndur voru eftir á klukkunni tókst honum að skora vallarmark af 55 metra færi (61 jard) og breyta stöðunni úr 15-16 í 18-16.

Detroit hafði 43 sekúndur og þrjú leikhlé til þess að fara í sína síðustu sókn. Boltinn tapaðist hins vegar um leið og leiknum í sjálfu sér lokið.

Baltimore hefur unnið átta leiki og tapað sex en staða Detroit er sjö unnir leikir gegn sjö töpuðum. Liðið þarf að vinna síðustu leiki sína og treysta á hagstæð úrslit til að komast í úrslitakeppnina.

Allt það helsta úr leiknum í nótt, þar á meðal sigurspyrnu Tucker, má sjá hér.