Lagerbäck: Strákarnir væla hvorki né kvarta

„Það vælir enginn. Engar kvartanir,“ segir Lars Lagerbäck um viðhorf íslensku landsliðsmannanna í knattspyrnu.

Landsliðsþjálfari Íslands er í viðtali við Guardian sem líkt og svo margir fjölmiðlar klóra sér í kollinum yfir þeirri staðreynd að litla Íslands sé umspilsleikjum frá sæti á heimsmeistaramótinu.

Aðspurður um viðhorf íslensku leikmannanna segir hann frá fyrrnefndu vælleysi sem hann fagnar.

„Líttu á ferðalög okkar sem dæmi. Við erum ekki ríkasta knattspyrnusambandið svo stundum eru ferðalögin óþarflega flókin. Einu sinni þurftum við að bíða í sex klukkustundir í London eftir flugvél og enginn sagði orð,“ segir Lagerbäck og rifjar upp ferðalag Íslands til Kýpur í undankeppninni.

Blaðamaður Guardian bendir á þá staðreynd að Lagerbäck sé að öllum líkindum besti landsliðsþjálfari álfunnar síðastliðin fimmtán ár. Hann kom Svíum á fimm stórmót í röð og hefði Yakubu Ayegbeni ekki klúðrað fyrir opnu marki af tveggja metra færi hefði Nígería komist í 16 liða úrslitin á HM 2010.

Þegar hann hafi tekið við Íslandi var liðið lakara en Liechtenstein samkvæmt styrkleikalista FIFA. Nú sé liðið umspilsleikjum gegn Króötum frá sæti í lokakeppni HM. Ísland yrði fámennasta þjóðin í sögunni til að komast þangað.

„Knattspyrnusambandið hafði engin skýr markmið þegar ég tók við. Það var aldrei rætt um að ég ætti að koma liðinu í umspil eða ná neinum ákveðnum árangri,“ rifjar Svíinn upp.

„Ég hefði hins vegar aldrei tekið starfið að mér hefði ég ekki talið möguleika á því,“ segir sá sænski. Hann rifjar upp sterkt 21 árs landslið Íslands sem komst í lokakeppni EM sumarið 2011. Liðið sé nú kjarni A-landsliðsins.

Lagerbäck segir liðið ekki hafa neinu að tapa gegn Króötum.

„Auðvitað yrðu það gríðarleg vonbrigði ef við kæmumst ekki til Brasilíu fyrst við erum svo nærri. En þetta er win-win staða að mínu mati,“ segir Lagerbäck.

„Það voru hvorki margir utan Íslands né á Íslandi sem höfðu trú á að við gætum komist svo langt. Jafnvel þótt væntingarnar hafi aukist í undankeppninni,“ segir Lagerbäck.

Svíinn segist hafa lært mikið í starfi sínu sem þjálfari Nígeríu. Sérstaklega utan vallar.

„Ég þurfti að hegða mér öðruvísi í leiðtogahlutverkinu. Þeir voru afar viðkvæmir fyrir gagnrýni og ég gat ekki gagnrýnt neinn fyrir framan allan hópinn,“ segir Lagerbäck. Hann segir engin leyndarmál varðandi það hvernig hann vinni vinnuna sína og nái árangri.

„Hjá öllum liðum sem ná árangri, ef frá er talinn góður hópur leikmanna, skiptir mestu að leikmenn þekki hlutverk sín og planið sé skýrt,“ segir Svíinn. Séu lið eins og Spánn og Barcelona skoðuð þá er ljóst að hugmyndafræðin sé afar skýr. Allir vita hvernig liðið á að spila.

Lagerbäck segir það ekki há sér að kunna ekki íslensku. Hann tali mikið ensku en notist einnig við sænskuna.

„Fjölmargir þeirra skilja norrænt mál. Ég tala sænsku við suma leikmenn í einrúmi en yfir hópinn þá tala ég ensku.“

Lagerbäck fagnar viðhorfi Eiðs Smára Guðjohnsen sem hann segir hafa mikinn leikskilning. Hann hafi komið sterkur inn í hópinn seinna árið eftir erfið meiðsli.

„Síðan þá hefur hann verið afar fagmannlegur, jákvæður innan hópsins og hefur rosalega gott auga fyrir spili.“

Lagerbäck heldur ekki vatni yfir Gylfa Þór Sigurðssyni. Hann telur að sá sparkvissi geti náð langt á ferli sínum.

„Hann hefur verið stórkostlegur í haust. Hann hefur verið stöðugt góður í undankeppninni en stigið stórt skref nú í haust. Hann er einstakur leikmaður þegar hann er miðsvæðis, staða sem hann fær ekki að spila hjá Tottenham, en hann er algjörlega frábær leikmaður,“ segir Lagerbäck. Hann minnist sérstaklega á vinnusemi hans og níutíu mínúturnar sem hann spilar fyrir Íslands hönd séu gulls ígildi.

Lagerbäck er spurður út í króatíska liðið og nýjan þjálfara þess, Niko Kovac. Lagerbäck þekkir aðeins til Kovac en hann telur úrslitin í undanförnum leikjum líklega gera það að verkum að andrúmsloftið í leikmannahópnum sé ekki sérstakt.

„Ég held að fótboltalega séð sé það ekki kostur að skipta um þjálfara þegar aðeins fjórar eða fimm æfingar eru til stefnu fyrir leik. Hann getur ekki gert það miklar breytingar á svo stuttum tíma.“

Fjölmargar myndir frá æfingu landsliðsins á Kópavogsvelli í dag má sjá hér.