Fimm ÍR-ingar yfir tíu stigin í bikarsigri á Blikum

ÍR er komið áfram í 16 liða úrslit Powerade-bikar karla í körfubolta eftir tíu stiga sigur á 1. deildarliði Breiðabliks, 85-75, í Smáranum í dag.

ÍR-liðið vann fyrsta leikhlutann 24-15 og var síðan 22 stigum yfir í hálfleik, 52-30. Það var því snemma ljóst að Breiðhyltingar voru að fram áfram.

Terry Leake Jr. var stigahæstur hjá ÍR með 25 stig en fjórir aðrir leikmenn liðsins skoruðu 10 stig eða meira. Fyrirliðinn Sveinbjörn Claessen var með 20 stig en hann hitti úr 6 af 8 þriggja stiga skotum sínum.

Hjalti Friðriksson (11 stig, 9 fráköst), Björgvin Hafþór Ríkharðsson (10 stig, 8 fráköst, 7 stoðsendingar) og Matthías Orri Sigurðarson (10 stig, 7 fráköst, 6 stoðsendingar) skiluðu sér allir yfir tíu stiga múrinn.

Jerry Lewis Hollis var í sérflokki hjá Blikum með 38 stig og 11 fráköst en Oddur Rúnar Kristjánsson kom honum næstur með 15 stig.