Nadal auðmjúkur eftir neyðarlegt tap

Spænski tenniskappinn Rafael Nadal féll mjög óvænt úr leik á Wimbledon-mótinu í gær. Var það í fyrsta skipti á hans ferli sem hann tapar í fyrstu umferð á risamóti.

Það var Belginn Steve Darcis sem skellti Nadal í gær en Darcis er í 135. sæti á heimslistanum. Hann hefur aldrei unnið stórmót en Nadal hefur unnið Wimbledon tvisvar og er nýbúinn að vinna opna franska meistaramótið.

Nadal tók ósigrinum vel og fór ekki ódýru leiðina að kenna meiðslum um tapið.

"Það er vont að tapa í fyrstu umferð en lífið heldur áfram. Ég óska Darcis til hamingju, hann spilaði frábærlega. Það er afsökun að tala um hnéð á mér og ég vil ekki afsaka mig," sagði Nadal.