Kringlukastarinn í NFL-deildinni

Einn mest spennandi nýliðinn í NFL-deildinni er hinn 21 árs gamli Lawrence Okoye. Þessi fyrrum kringlukastari hefur aldrei spilað amerískan fótbolta en mun spila fyrir eitt besta lið deildarinnar næsta vetur, San Francisco 49ers.

Okoye komst í úrslit Ólympíuleikanna í London í kringlukasti. Þar endaði hann í tólfta sæti sem þótti frábær árangur hjá svo ungum manni.

Sérstaklega í ljósi þess að hann byrjaði að æfa íþróttina aðeins tveim árum áður. Hann náði strax undraverðum árangri í íþróttinni og varð heimsmeistari unglinga árið 2011.

Þegar hann tilkynnti í mars að hann hefði áhuga á því að fara í NFL-deildina hafði strax fjöldi félaga samband við hann.

Hann sló í gegn í æfingabúðunum fyrir nýliðavalið og úr varð síðan að 49ers ákvað að taka hann.

"Það hentar mér best að fara til 49ers. Þeir hafa sömu sýn og ég og þetta gæti orðið frábær saga," sagði Okoye.

Jim Harbaugh, þjálfari 49ers, er yfir sig hrifinn af stráknum sem hann segir vera fallegan og glæsilegan mann.

"Hann er eins og Adonis. Þetta er grískur Guð og ótrúlegt eintak af manni. Himnafaðirinn bjó til fallegan mann er hann bjó til Okoye," sagði Harbaugh en hann ætlar að nota Okoye í vörninni.

Strákurinn er Englendingur en foreldrar hans eru frá Nígeríu.