Mannréttindadómstóll Evrópu fjallar um mál Pussy Riot

Þrír meðlimir rússnesku pönkhljómsveitarinnar Pussy Riot reka nú mál sitt fyrir Mannréttindadómstóli Evrópu.

Konurnar þrjár voru fangelsaðar á síðasta ári eftir að hafa verið fundnar sekar um óspektir á almannafæri.

Lögmenn þeirra sögðu í dag að dómsmálayfirvöld í Rússlandi hefðu brotið á fjórum greinum mannréttindasáttmála Evrópu þegar dómurinn var kveðinn upp.

Konurnar hlutu allar tveggja ára fangelsisdóma fyrir að hafa skipulagt mótmæli í kirkju rússnesku rétttrúnaðarkirkjunnar í Moskvu. Mótmælin beindust að yfirvöldum í Rússlandi og Vladimír Pútín, Rússlandsforseta.