Tennis-tvíburararnir skrefi nær enn einum sigrinum

Bandarísku tvíburarnir Bob og Mike Bryan tryggðu sér í dag sæti í undanúrslitunum í tvíliðaleik á opna ástralska mótinu í tennis. Þeir unnu Daniele Bracciali og Lukas Dlouhy í tveimur settum í átta manna úrslitunum.

Bob og Mike Bryan eru 34 ára gamlir og eineggja tvíburarar. Þeir eiga möguleika á því að vinna sitt þrettánda risamót í tvíliðaleik sem er nýtt met en þeir eru þegar þeir sem hafa unnið flest mót í tvíliðaleik á ferlinum eða alls 83.

Í ágúst síðasliðnum unnu þeir Bob og Mike Ólympíugull í London og hafa þar með unnið saman öll stærstu mótin: Opna ástralska (5: 2006, 2007, 2009, 2010, 2011), opna franska (1: 2003), Wimbledon (2: 2006, 2011), opna bandaríska (4: 2005, 2008, 2010, 2012) og Ólympíugull (1, 2012).

Bob og Mike Bryan mæta Ítölunum Simone Bolelli og Fabio Fognini í undanúrslitunum.