Íslensku útlagarnir á leið í keppnisferð til Bandaríkjanna

Íslensku rugby liðin Rugby félag Kópavogs og Rugby félag Reykjavíkur eru á leiðinni í keppnisferð til Kanada og Bandaríkjanna en þetta kemur fram í fréttatilkynningu frá strákunum.

Liðið, sem er sett saman sérstaklega fyrir þessa ferð, ber nafnið „Íslensku útlagarnir'' eða „Icelandic Exiles" og samanstendur hópurinn af hátt í 20 íslenskum leikmönnum sem munu njóta stuðnings leikmanna frá Kanada og Bandaríkjunum í ferðinni til að hafa varamenn og klapplið.

Leiknar verða tvær útfærslur af rugby, fimmtán manna annars vegar og hins vegar sjö manna.

Báðar eru þær svipaðar í grunninn, en megin munurinn er sá að sjö manna útgáfan er styttri og hentar því betur fyrir mót sem ekki eru lengri en ein helgi og eru þá spilaðir fleiri leikir.

Fyrsti viðkomustaður útlaganna er Vancouver, Kanada, en þar verður hópnum skipað í tvö fimmtán manna lið sem mæta Burnaby Lake Rugby Club í tveimur leikjum, nægur fjöldi og áhugi er hjá báðum liðum til að tefla fram A og B liðum.

Því næst liggur leiðin til Seattle í norðvestur Bandaríkjunum, en þar mætir Íslendingaliðið heimaliðinu Valley Kangaroos RFC á Magnusson Park. Næsti viðkomustaður er Portland, Oregon og þar mun liðið mæta ORSU Jesters.

Endastöðin er svo Las Vegas Invitational – USA Sevens Rugby.

Mót þetta er haldið árlega samhliða því að sterkustu rugbyþjóðir keppa sín á milli í USA Sevens, en mótsfyrirkomulagið svipar til þess sem við þekkjum úr formúlu 1 aksturskeppninni. Flakkað er milli heimshorna og keppt á mótum sem veita stig og það lið sem endar með flest heildarstig er krýndur heimsmeistari.

Hér tefla útlagarnir fram tveimur liðum sem keppa í sitt hvorum flokknum.

Íslensku útlagarnir munu keppa í fimmtán manna rugby í flokki liða og mun þar mæta liðum á borð við Ancient Aztecs, Edmonton Clansmen og Marine Corps Old Breed.

Seinna liðið verður einskonar úrvalslið Íslands og mun keppa í sjö manna rugby í meistaraflokki. Úrvalsliðið var dregið í B riðil og verða andstæðingar í þeim riðli engin lömb að leika við, en þar má finna lið á borð við US Air Force, landslið Chile, Bermuda og Mexíkó og USA Falcons.

Þrátt fyrir að Íslensku útlagarnir séu ekki að forminu til landslið Íslands er lagt upp með að stilla liðum upp þannig að þau uppfylli reglugerð alþjóða rugby sambandsins um landslið. Ólíkt mörgum öðrum íþróttum er ekki gerð krafa um ríkisborgararétt landsliðsleikmanna.

Hins vegar þurfa leikmenn að uppfylla eitt af þremur skilyrðum sambandsins:

... að vera fæddur í viðkomandi landi

... foreldri, afi eða amma fædd í viðkomandi landi

... eða hefur haft fasta og óslitna búsetu í minnst 36 mánuði í landinu fyrir leik

Þessum skilyrðum verður avo að fullu fylgt þegar haldið veruð í keppnisferð til Eistlands síðar á árinu þar sem mótherjar verða landslið Finna og Eista.

Hér á landi æfa um 50 manns rugby og fer fjölgandi. Unnið er að stofnun kvennaliðs og hefur kvennalið í 7 manna rugby boðað komu sína til landsins í lok maí samhliða karlaliði sem mun mæta Íslendingum í fimmtán manna útgáfu leiksins.