Sjötíu laga ofurpakki Valgeirs

Tónlist. Spilaðu lag fyrir mig. Valgeir Guðjónsson.



Á Spilaðu lag fyrir mig eru sjötíu lög sem Valgeir Guðjónsson samdi, einn eða í félagi við aðra, á þeim ríflega fjörutíu árum sem eru liðin síðan hann byrjaði í poppbransanum. Platan er gefin út í tilefni af sextíu ára afmæli Valgeirs sem hann fagnar einnig með tónleikum í Hörpu. Mörg þeirra laga og texta sem hér er að finna voru samin með félögum Valgeirs í Spilverki þjóðanna og Stuðmönnum, en eins og Valgeir tekur fram á plötuumslaginu, þá eiga þau það sammerkt að þar hefur hans hlutur verið stærri en hinna höfundanna.

Auk laga sem samin voru fyrir fyrrnefndar sveitir eru á Spilaðu lag fyrir mig meðal annars lög af plötum Hrekkjusvína og Jollí og Kóla og lög af sólóplötum Valgeirs. Um það bil helmingur laganna í þessum þrefalda pakka eru með Stuðmönnum og Spilverkinu.

Valgeir er mjög góður laga- og textasmiður eins og heyrist vel hér. Mörg laganna hafa náð miklum vinsældum og flest þeirra hafa líka elst vel. Þarna eru meðal annarra Popplag í G-dúr, Blindfullur, Íslenskir karlmenn, Slá í gegn, Bíólagið, Gestir út um allt og Gerum okkar besta. Flest laganna eru með upprunalegum flytjendum, en í nokkrum tilfellum eru aðrir flytjendur, t.d. Todmobile (Haustið 75), Matti Matt (Ekki bíl), Hjálmar (Ólína og ég) og Helgi Björns (Kramið hjarta). Þá eru einhver lög flutt af Valgeiri sem áður voru með hljómsveitunum hans, t.d. Hrekkjusvínalagið Gestir út um allt og Stuðmannalagið ÚFÓ. Engin þessara síðari tíma útgáfa er betri en frumútgáfan, en sú ákvörðun að hafa þær með kemur samt vel út og eykur fjölbreytnina. Það virðist engri sérstakri reglu fylgt varðandi niðuröðun laganna, enda hefði það kannski verið snúið. Tímaröð, sem oft virkar vel, hefði til dæmis ekki komið vel út í þessu tilfelli.

Á heildina litið er Spilaðu lag fyrir mig næsta pottþéttur sjötíu laga popppakki. Það eru líkur á því að margir Spilverks- og Stuðmannaaðdáendur eigi flest þessara laga fyrir einhvers staðar í fórum sínum, en það er gott að fá úrval lagasmíða Valgeirs Guðjónssonar á einn stað. Þessi pakki er ekki jafn bráðnauðsynlegur og heildarútgáfa Spilverksins sem kom út fyrir rúmu ári, en fínn engu að síður.



Niðurstaða: Öll þekktustu lög Valgeirs Guðjónssonar í þreföldum afmælispakka.